धनतेरससँगै सुरु भयो तिहार, यसपालि ६ दिन मनाइँदै

नेपालीको दोस्रो ठूलो चाड तिहार शुक्रबारदेखि सुरु भएको छ। तिहारको पहिलो दिन आज देशभर धनतेरस मनाइँदैछ।

धनतेरसका अवसरमा नयाँ गरगहना, सुनचाँदीका सिक्का तथा धातुका भाँडाकुँडा किनेर घरमा ल्याई पूजा गर्ने परम्परा छ। यस दिन धनधान्य र समृद्धिको कामना गर्दै घरमा दीप प्रज्वलनसमेत गरिन्छ।

सामान्यतया पाँच दिन मनाइने तिहार यस वर्ष तिथिको घटबढका कारण छ दिनसम्म मनाइने भएको छ। चन्द्रमासअनुसार कात्तिक कृष्णपक्षको त्रयोदशीदेखि कात्तिक शुक्लपक्षको द्वितीयासम्म तिहारका विभिन्न पर्व मनाउने गरिन्छ।

त्रयोदशीकै दिन मनाइने कागपूजा र धन्वन्तरी जयन्ती भने शनिबार परेको छ। त्यसैगरी आइतबार बिहान चतुर्दशी तिथिमा कुकुर पूजा गरिनेछ भने सोही दिन साँझ लक्ष्मीपूजा मनाइनेछ।

धनतेरसका दिन धातुका भाँडाकुँडा, गरगहना, खरेटो तथा धनियाँ किन्ने प्रचलनसमेत रहेको छ। मिथिला क्षेत्रमा भने कात्तिक कृष्ण त्रयोदशीको साँझ दीपमालिका गर्ने परम्परा छ।

यस वर्षको तिहारअन्तर्गत भाइटीका आगामी कात्तिक २५ गते परेको छ। भाइटीका सम्पन्न भएसँगै यस वर्षको तिहार पर्व समापन हुनेछ।