छठ पर्वको दोस्रो दिन आज ‘खरना’, व्रतालुहरू निराहार व्रतको तयारीमा

तराई –मधेशसहित देशभर श्रद्धा र भक्तिपूर्वक मनाइने सूर्य उपासनाको महापर्व छठको दोस्रो दिन आज शनिबार ‘खरना’ विधि गरिँदैछ। चार दिनसम्म मनाइने छठ पर्वको महत्वपूर्ण दिनका रूपमा खरनालाई लिने गरिन्छ।

खरनाका दिन व्रतालुहरूले दिनभर उपवास बसेर साँझपख स्नान गरी शुद्धतापूर्वक पूजा आराधना गर्ने गर्छन्। यस दिन विशेषगरी नयाँ माटोको चुल्होमा पकाइएको खीर, रोटी तथा अन्य शुद्ध परिकार सूर्यदेव र छठी मातालाई अर्पण गरी प्रसादका रूपमा ग्रहण गर्ने परम्परा छ।

खरना विधि सम्पन्न गरेपछि व्रतालुहरूको कठिन निर्जला व्रत सुरु हुन्छ। त्यसपछि उनीहरूले करिब ३६ घण्टासम्म अन्न र पानीसमेत ग्रहण नगरी सूर्यदेवको आराधना गर्ने धार्मिक मान्यता रहेको छ।

छठ पर्वको तेस्रो दिन आइतबार अस्ताउँदो सूर्यलाई नदी, पोखरी तथा जलाशयका किनारमा पुगेर अर्घ्य अर्पण गरिनेछ। चौथो तथा अन्तिम दिन सोमबार बिहान उदाउँदो सूर्यलाई अर्घ्य दिएपछि यस वर्षको छठ पर्व विधिवत् रूपमा सम्पन्न हुनेछ।

छठ पर्व सुरु भएसँगै तराई–मधेशका गाउँ तथा सहरमा उत्साह बढेको छ। विभिन्न स्थानमा छठघाटको सरसफाइ, सजावट तथा पूजाका सामग्रीको व्यवस्थापन भइरहेको छ। बाँसका सामग्री, फलफूल, नरिवल, उखु र ठेकुवा लगायतका प्रसादको किनमेलमा समेत बजारमा चहलपहल बढेको छ।