पर्सामा पेस्तोल र गोलीसहित दुई जना पक्राउ

पर्साको विन्दवासिनी गाउँपालिका–५ प्रसौनीभाठाबाट सशस्त्र प्रहरीले पेस्तोल, गोली र छुरासहित दुई जनालाई पक्राउ गरेको छ।

सोमबार सशस्त्र प्रहरी बल नेपाल, बोर्डर आउट पोस्ट प्रसौनीभाठाबाट खटिएको टोलीले नियमित जाँचका क्रममा भारतीय नम्बर प्लेटको मोटरसाइकलमा सवार दुई जनालाई शङ्का लागेर जाँच गरेको थियो। त्यस क्रममा उनीहरूले बोकेको झोलाभित्र कपडाले लुकाएर राखिएको अवस्थामा हतियार तथा अन्य सामग्री फेला परेको सशस्त्र प्रहरीले जनाएको छ।

प्रहरीले उनीहरूको साथबाट एक थान डोमी पेस्तोल, ६ राउन्ड डोमी गोली, तीन थान छुरा, नेपाली रुपैयाँ ९ हजार ४००, भारतीय रुपैयाँ २२ हजार ४०, दुई थान भिभो मोबाइल र विभिन्न किसिमका औषधि बरामद गरेको छ।

पक्राउ परेका दुवै जनालाई आवश्यक अनुसन्धान तथा कानुनी कारबाहीका लागि सम्बन्धित निकायमा बुझाउने प्रक्रिया अघि बढाइएको सशस्त्र प्रहरीले जनाएको छ।