साउदीको अरामको भवनमा हुथी विद्रोहीको आक्रमण, ऊर्जा संरचनामा तनाव बढ्दै

यमनका हुथी विद्रोहीहरूले साउदी अरेबियाका तेल तथा ऊर्जा संरचनालाई लक्षित गर्दै आक्रमण तीव्र पारेका छन्। पछिल्लो आक्रमणका क्रममा साउदी अरेबियाको धाह्रानस्थित तेल कम्पनी अरामकोको भवनमा सामान्य आगलागी भएको छ।

साउदी ऊर्जा मन्त्रालयका अनुसार घटनामा कुनै मानवीय क्षति भएको छैन। तेल संरचना तथा सुरक्षा क्षेत्रबाट टाढा रहन नागरिकलाई चेतावनी दिइएको भए पनि हुथी विद्रोहीहरूले साउदी पूर्वाधारलाई लक्षित गर्ने गतिविधि जारी राखेका छन्।

हुथीहरूको आक्रमणपछि साउदी अरेबियाको नेतृत्वमा रहेको गठबन्धन सेनाले यमनमा हुथी नियन्त्रणमा रहेका ऊर्जा टर्मिनल तथा इन्धन भण्डारण केन्द्रलाई लक्षित गरी हवाई कारबाही तीव्र बनाएको छ। गठबन्धन सेनाका प्रवक्ता तुर्की अल–मालिकीले सैन्य कारबाहीका क्रममा नागरिकलाई हुन सक्ने सम्भावित क्षति रोक्न सावधानी अपनाइएको बताएका छन्।

यसैबीच, अमेरिकी राष्ट्रपति डोनाल्ड ट्रम्पले आगामी मध्यावधि निर्वाचनलाई ध्यानमा राख्दै ऊर्जा मूल्य बढाउने उद्देश्यले हुथी विद्रोहीहरूले साउदी पूर्वाधारमाथिका आक्रमण बढाएको टिप्पणी गरेका छन्।

अर्कोतर्फ, मध्यपूर्वमा जारी तनाव कम गर्ने प्रयास पनि भइरहेको छ। इरानको विदेश मन्त्रालयका अनुसार हर्मुजको जलडमरूमध्य हुँदै व्यावसायिक जहाजहरूको सुरक्षित आवागमन सुनिश्चित गर्न इरान र ओमानबीच अस्थायी सुरक्षित जलमार्गको अवधारणामा समझदारी नजिक पुगेको छ।

मध्यपूर्वमा जारी द्वन्द्वले क्षेत्रीय सुरक्षासँगै विश्वव्यापी ऊर्जा आपूर्ति र इन्धनको मूल्यमा समेत प्रभाव पार्न सक्ने चिन्ता बढाएको छ। तेल तथा ऊर्जा पूर्वाधारमाथि हुने आक्रमणले अन्तर्राष्ट्रिय बजारमा थप अनिश्चितता सिर्जना गर्न सक्छ।