Communist Nepal Leader Prabhu Sah

 प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरिनु संविधानको मर्म र जनादेश विपरीत रहेको भन्दै नेपाल कम्युनिष्ट पार्टीका नेता तथा सांसद प्रभु साहले आपत्ति जनाएका छन् । नेता साहले यो परिघटना वर्तमान त्रुटिपूर्ण संविधानको उपज रहेको जीकिर गरेका हुन् ।

नेकपा प्रदेश २ का अध्यक्ष समेत रहेका नेता साहले लगभग दुई तिहाईको बहुमतको साथ स्थिरता र तीव्र विकासको दिशामा अघि बढ्नुको सट्टा चुनावको विकल्प रोज्नु आत्मघाती भएको बताएका हुन् । नेपालको संविधान विश्वको अन्य राष्ट्रको भन्दा फरक र अन्य सबैखाले शासकीय स्वरुपहरुको खिचडी भएकोले संसद बिघटन जस्ता विभिन्न असंवैधानिक कार्यहरू भईरहेको बताए ।

‘विश्वको जुनसुकै राष्ट्रहरुमा शासकीय स्वरुप एउटा निश्चित सिद्धान्त (मूल्य र मान्यता) को आधारमा तय गरिएको हुन्छ तर नेपालको शासकीय स्वरुप विपरीत सिद्धान्तहरुको खिचडी हो ।’ नेता साहले भने, ‘सामन्तवादी, पुँजीवादीरदलाल(पुँजीवादी, सर्वहारावादी पश्चगामी, यथास्थितिवादी र अग्रगामी बिचार र सोचवाला पार्टीहरुको निहित स्वार्थमा तयार भएको कनफ्यूजन व्यवस्थाले गर्दा नै यस्तो परिणाम देखिएको हो ।’

‘यसमा शक्ति पृथकीकरण र शक्ति सन्तुलनको तालमेलको पनि अभाव छ । जसले गर्दा अस्थिरता र अराजकता अझ बढ़ने निश्चित छ ।’ नेता साहले थपे, ‘अहिले देशमा देखिएको संसद विघटनको घटना पनि त्यसकै उपज हो । जुन आपत्तिजनक छ ।’